Site icon EventiFVG.it

Suns Friûl

Suns Friûl - EventiFVG.it

📅 Ai 22 di Avost al rive Suns Friûl e us propon une serade siore di artiscj e di grups, cu la lôr musiche e lis lôr cjançons, a metin in valôr il Friûl e lis sôs specificitâts!

A presentâ l’event a saran Raffaele Serafini e Serena Fogolini de ostarie leterarie Contecurte ✨

__

🎙️ Corte di Lunas
Un grup di folk rock che al met adun, cun grande capacitât musicâl e cuntune presince seniche potente, atmosferis che si movin a scjavaç jenfri Ete di Mieç e Rinassince. Cul ultin lavôr “Tales from the Brave Lands” a cjantin par inglês, furlan e talian lis liendis dal Friûl e a tornin a scuvierzi lis lidrîs salvadiis de lôr tiere. Flaut, ghironde e corâls polifonichis si zontin ai struments classics dal rock par dâ ae lôr musiche un savôr epic.

🎙️ Brût & Madone
A son la bandiere de musiche metal in Friûl e par furlan. Dal 2006 incà, une sdrondenade tes orelis e une provocazion che si ripet simpri gnove tai lôr concierts memorabii. Intal lôr metalcore si struchin lis esperiencis musicâls precedentis dai membris, dal death metal di Slowmotion Apocalypse e Rumors of Gehenna al punk hardcore dai Rabiosi. “Amîs Bire Casin” e “Welcome to the cjôt” a son i titui emblematics – come il lôr non – dai ep che a àn produsût.

🎙️ Dissociative TV
Un om e une femine, une ghitare eletriche e une batarie, une vôs e velu ca, dibot, il punk rock melodic che ti fâs saltâ su la cjadree. Trê discs za fats e un cuart a pene publicât “Insomnia Day / Un dì cence durmî”, par furlan e par inglês. Il grup furlan che al sune di plui, centenârs di concierts ator pal Friûl, pe Italie e pe Europe, in ogni sorte di puest e cun ogni sorte di timp. La lôr e je la lenghe drete dal rock, cjançons curtis e che si tocjin.

🎙️ Alvise Nodale
Al è l’erêt de cjançon di autôr che in Cjargne – il lûc di dulà che al ven – e je ben inlidrisade, ma ancje de musiche tradizionâl che al à studiât e sunât cun mestris tant che Giulio Venier e Lino Straulino. Doi disc a so non, “Conte Flame” par furlan e “The Dreamer” par talian, e tantis colaborazions cun cjantants, autôrs e grups diferents, che lu rindin une figure centrâl de gnove sene musicâl dal Friûl.

🎙️ Ostajki
I “vanzums” – chest il significât dal lôr non – a son un grup transfrontalîr in vore dal 2017 e fat sù, a pont, cun ce che al vanze di altris esperiencis musicâls. Al Senjam Beneške Piesmi, il festival de cjançon de Slavie furlane, a àn vint il premi de critiche “Aldo Klodič” e cumò a son daûr a produsi un “concept album” centrât su lis figuris mitologjichis des contis de Benečija. Tra rock, psichedelie, prog, eletroniche e moments acustics.

Exit mobile version